बङ्गलादेशले प्रजातान्त्रिक सुधारका कार्यक्रम सार्वजनिक गर्ने

बङ्गलादेशको अन्तरिम सरकारले विगतको निरंकुश शासन सत्तालाई अपदस्थ गरेको एक वर्ष पूरा भएको उपलक्ष्यमा अगष्ट ५ तारिखका दिन प्रजातान्त्रिक आमूल परिवर्तनका कामहरूको सूची जारी गर्ने शनिबार जनाएको छ । करिब १७ करोड जनसङ्ख्या रहेको बङ्गलादेशमा विद्यार्थी नेतृत्वको विद्रोहले राजनीतिक परिवर्तन ल्याएको हो । सन् २०२४ अगष्ट ५ मा तत्कालीन प्रधानमन्त्री शेख हसिनालाई पदच्युत गरी १५ वर्ष लामो शासन अन्त्य गरेपछि नयाँ सरकार गठन भएको हो । नोबेल शान्ति पुरस्कार विजेता ८५ वर्षीय मोहम्मद युनुसले निर्वाचन नहुञ्जेलका लागि कामचलाउ सरकारको प्रमुख सल्लाहकारको रूपमा नेतृत्व गरिरहनुभएको छ । युनुसले यसअघि प्रजातान्त्रिक संस्थाहरूको सुधारका लागि ‘ठूलो प्याकेज’ सार्वजनिक गर्ने प्रतिबद्धता जनाउनुभएको थियो । सन् २०२६ को सुरुमा हुन लागेको चुनावअघि राजनीतिक दलहरूबीच सत्ताका लागि होडबाजी चल्दा सहमतिको प्रयासमा सुस्तता छाएको छ । युनुसको सरकारले राजनीतिक शक्ति सङ्घर्षले प्राप्त उपलब्धिलाई खतरामा पार्ने चेतावनी दिएको छ । जुलाई २९ मा युनुसले आफू समावेशी, सहभागितामूलक र विश्वसनीय निर्वाचन प्रदान गर्ने नयाँ राजनीतिक प्रणालीका लागि व्यापक राष्ट्रिय सहमति निर्माण गर्न लागि परेको बताउनुभएको थियो । युनुसको कार्यालयले शनिबार भनेको छ, “जनविद्रोहमा संलग्न सबै राजनीतिक दलहरूको उपस्थितिमा जुलाईको घोषणा अनुसार राष्ट्रसमक्ष कार्यक्रम प्रस्तुत गरिनेछ।” हसिनाको शासनकालमा उहाँका राजनीतिक विरोधीहरूलाई सामूहिक हिरासत र गैरन्यायिक हत्या गर्ने लगायतका व्यापक मानव अधिकार उल्लङ्घन भएका थिए। उहाँको सरकारमाथि अदालत र निजामती सेवाको राजनीतिकरण गरेको, एकतर्फी निर्वाचन गराएको र आफ्नो शक्तिमाथिको लोकतान्त्रिक नियन्त्रणलाई ध्वस्त पारेको आरोप पनि लागेको थियो । आन्दोलनको चरम उत्कर्षपछि ७७ वर्षीया हसिना भागेर भारत पुग्नुभएको थियो । उहाँलाई उहाँको शासनकालमा भएका भनिएका मानवताविरुद्धको अपराधको अभियोगमा चलिरहेका मुद्दाको सुनुवाइमाका लागि उपस्थित हुन अदालतले आदेश दिएको छ तर उहाँले ती मुद्दा राजनीतिक प्रतिशोधका कारण लगाइएको भन्दै आदेशको अवहेलना गर्नुभएको छ । सन् २०२४ जुलाई १ मा विश्वविद्यालयका विद्यार्थीहरूले सार्वजनिक क्षेत्रको जागिरका लागि कोटा प्रणालीमा सुधारको माग गर्दै सुरू गरेको विरोध प्रदर्शनले अन्ततः उहाँको शासनमाथि नै धावा बोलेको थियो । सन् २०२४ को अगष्ट ५ मा हजारौं प्रदर्शनकारीले हसिनाको दरबारमा प्रवेश गरेपछि उहाँ परिवारका सदस्य तथा निकट सहयोगीसहित हेलिकप्टरमार्फत् भारतमा शरण लिन पुग्नुभएको थियो ।

थप समाचारहरु

ईम्बार्क कलेजमा उच्च शिक्षाको रूपान्तरणमा ट्रान्सनेसनल एजुकेसनको भूमिकाबारे छलफल अमेरिकी कर नीति र रोजगारीको घट्दो दरले बजारमा नकारात्मक असर रुसी आक्रमणमा युक्रेनमा पाँचको मृत्यु, युक्रेनी ड्रोन आक्रमणले रुसको तेल प्रशोधन केन्द्रमा क्षति इजरायलको आर्थिक वृद्धिदर घट्दै विश्वभर बेपत्ताको सङ्ख्या बढ्दै गएको रेडक्रसको भनाइ अमेरिकाको ब्याट्री कारखानामा छापाः ३०० भन्दा बढी दक्षिण कोरियाली नागरिक पक्राउ